Dette skriv Kystverket i ei pressemelding.
Stad skipstunnel vert bygt av ein hovudentreprenør gjennom ei totalentreprise, som vert lyst ut i 2024 og byggestart kan kome i 2025.
– Vi søkjer ein rådgivar og samarbeidspartnar som skal hjelpe oss med dette arbeidet. Den nye samarbeidspartnaren vår blir med oss fram til tunnelen er ferdig bygd, altså både med førebuande arbeidar og i tilbods-, prosjekterings-, byggje- og avslutningsfasen, seier prosjektleiar for Stad skipstunnel i Kystverket, Terje Skjeppestad.
Den tekniske samarbeidspartnaren vil komplettere Kystverkets eige prosjektteam, som i dag består av 10 tilsette.
– Vi ser for oss at prosjektorganisasjonen vil bli ein del større når vi skal i gang med sjølve bygginga av skipstunnelen, anten via faste tilsetjingar, innleige og/eller innleige via denne rammeavtalen, seier Skjeppestad.
Kontraktsverdi
Verdien på konkurransen og avtalen som no er kunngjord i Doffin er estimert til 30 – 90 millionar kroner, og ved utløysing av opsjon på innleige er det sett eit maksimal verdi på 150 millionar kroner.
Rådgivingsfirmaet skal hjelpe prosjekt Stad skipstunnel med ingeniørarbeid innanfor alle nødvendige tekniske fag. Særskilde fag som Kystverket vurderer som viktige er geoteknikk, geologi, konstruksjonar, tekniske installasjonar, korrosjon og HMS.