I år var det mykje song; frå solo-framføringar til kor, og nesten alt i mellom. Felleskoret starta showet, med songarar frå Fiskå barnekor og songarar frå korøvingane på Åheim. Ein god variasjon i sjanger og tema var det gjennom songane; frå balladar til stemningsfull pop som fekk heile salen til å klappe med.
GOD STEMNING: Folk klappa med til Leikarringen sin dans.
Kunstnarar
Under pausa kunne ein kike nærare på kunstverka som deltok. Magdalena Chrobok hadde teke med seg sine prosjekt frå fjorårets og årets kunstveker. Ho studerar kunst, design og arkitektur ved Volda vidaregåande skule, og kunne fortelje at det var godt på besøk på utstillinga elevane hadde i mars.
Romeo Frank Slagnes Endal har vore på kurs hos Marte Sæther og lært seg tørrpastell-teknikkar av Marte Sæther.
– Det var veldig kjekt. Eg har kjøpt meg utstyr og kjem til å halde fram med denne teknikken, fortalde Endal.
KUNSTNAR Romeo Frank Slagnes Endal.
Imponerade innsats
I to bolkar var det song og dans på scena. Og vi, som nok resten av publikum, vart imponerte over framføringsevne og motet som skal til for å stå slik på ei scene og dele litt av seg sjølv. Og også kapasitet. Som t.d. hos Lorine Bakkebø Jensen som var med på heile fire songar etter kvarandre(!). Ho song saman med NoName, og i duettar, og også åleine. Åleine på scena var også Linnea Ekrem Ervik (9 år), som song “Chandelier” av Sia.
– Eg synest den er enkel, sa Linnea, då vi i pausa fekk ein prat med den unge songaren, og la fram at dette var ein vanskeleg song. Ho la til at ho trivst med å synge åleine.
Leikarringen viste fram ulike dansestilar i løpet av dei tre songane dei valde seg ut, før “V-boys” stod for avslutninga: songen “Fjord nights” som ein har laga på kulturskulen sitt nyoppretta tilbod “musikkproduksjon”.
SIA- songen “Chandelier” vart framført av Linnea Ekrem Ervik.
Fersk produksjon
Per-Jonas Otterlei Moen er lærar for denne linja, og fortel at dei tre elevane har vore veldig kreative.
– Alle tre var med i prosessen, og fekk påverke både kva songen skulle handle, korleis han skulle høyrast ut, og val av instrument. Etter kvart vart vi einige om å blande EDM, pop og country, saman med ein tekst som handar om kvardagslege ting ein kan kjenne seg att i når ein bur i Vanylven, seier Moen og trekk fram eksempel frå teksten som fjell, fjordar, ferje, råning og den “skeive solsikka som framleis står der etter alle desse åra”. Som vokalist fekk dei med seg ein tidlegare skulekamerat av Moen.
Læraren seier det viktigaste målet var at elevane var med frå ingenting til ferdig låt, og opplever at elevane har fått innsikt i kva som faktisk ligg bak arbeidet med å lage ein song.
BLOMAR: Randi Irene Helgøy delte ut blomar til ungdomsrådet, og takka for innsatsen.