Endeleg juni og Monsiade

Monsiadegeneral Arne Sandnes tok ordet då dei fleste hadde kome seg på plass, og startnummera var komne på. 

– Det er ei glede og ei ære å ønske velkomne til den 27. Monsiaden. Og svært gledeleg å sjå at så mange kom. Kvar gong er eg nervøs, og tenker at det kanskje ikkje er mange som tek turen, men, eg tek feil kvart år, sa han med eit smil.

Han såg fram til aktivitet ute, og sosialt inne, og fortsette så med det far hans, Mons, brukte å seie før start: 

– Er dokke klare? Sa dokke nei? spurte han gjengen på Eidsåvoll, og fekk jublande «JAAA» tilbake, begge gongane. 

Plass til alle

Denne gongen var det Volda- ordførar Sølvi Dimmen som stod for den offisielle opninga. Ho kunne fortelle at det kribla i magen på morgonen, då ho gledde seg slik til denne dagen. 

– Vi ordførarane er glade for å ha vorte invitert, og vi er klare for å heie, vere med, og dele ut premiar. Det viktigaste av alt i dag er å kose oss, heie på kvarandre, treffe venner, og kanskje danse litt, sa Dimmen.

Ho synest det var flott med så mange påmelde – med ekte idrettsglede.

– Her er det plass til alle. For dei som vil springe for å vinne, og dei som spring for å kome i mål. Og til og med vêret smilar til oss i dag! 

Mange postar

Tradisjonen tru vart det oppvarming med 7.klasse som instruktørar, med fugledans, klapp og svingom – etterfølgt av Monsiadesongen til Merkesteinane. 

Og så var ein i gang, med 400 meter først på lista. Damene først, og så herrane. Ei heil runde rundt bana der alle ga topp innsats. Med heiarop i alle svingar fekk idrettsutøvarane ekstra futt, og kom nærmare og nærmare målstreken. 

For dei som ikkje hadde lyst å springe, var det også mange andre aktivitetar å finne: Lengdehopp, balansering, pilkast på ballong, spikring, kaste ball og forundringsboks med premiering. Over alt kvar vi gjekk, møtte vi deltakarar som hadde gleda seg til denne dagen, og hadde teke turen til Vanylven frå heile Sunnmøre, og Nordfjord.

Boccia 

Før oppvarminga, tok Veslemøy Ervik ordet, og ville gi ein ekstra applaus til «Ball og boccia»-laget i Vanylven som har fått seg fine, nye drakter. Desse fekk dei endeleg ta på seg og med ut på bana. Mange lag fann plass på benkane, der det vart både tap og seier. 

I cupen var det Hjellebakken som sigra over Herøy, og fekk spele mot ordførarlaget, som bestod av Tine Storøy frå Herøy, Paul Sindre Vedeld frå Vanylven og Sølvi Dimmen frå Volda. I finala var det vår eigen ordførar som sette siste ball, og sikra sigeren til ordførarane.

Arne Sandnes var nøgd med vêret og dagen, og positiv som alltid.