Ordføraren: Kommunale tenester er i beredskap

– I følgje vêrmeldingane, så vert Vanylven meir skåna enn mange andre kommunar i nært omland. Heldigvis er ikkje vinden så sterk, og blir det heller ikkje i følgje meldingane per no. Likevel er det enorme mengder med vatn som kjem ned, og vi må vere merksame på at bekkar renn over, at elvar kan finne alternative løp, at kjellarar får inn vatn, og at ein del innbyggarar kan verte engstelege for moglege konsekvensar, skriv Landsverk Sande på Facebook torsdag ettermiddag.

Samtidig legg ho til at kommunale tenester og politi er i beredskap.

– Politiet er per no avventande i høve situasjonen i Vanylven. Skulle du kome på ein veg som er fløymd over, så ring Politiet på 02800 for å varsle, så er du med på å sikre at ikkje nokon vert skadde som følgje av vatnet. Ver varsame når de køyrer bil, om de må ut på vegane i dag. Vassplaning kan ein unngå ved å ta det med ro undervegs, og det må ein tenkje på heile tida når ein er i bil no, skriv ho.

Ho melder også om eit par vasslekkasjar i kommunale bygg, og der er vassinntrenging i kjellaren på Åheim skule.

– Vaktmeistrane har kontroll, og melder om små skadar. Dette er ikkje i områder der borna oppheld seg. Vi tek ingen risiko når det gjeld liv og helse. Vi har hatt entreprenør til å grave tett på Syvdetun, for å sikre at vatn ikkje går inn i bygningane der. Straumstansen i Syvde i går kveld vart raskt ordna, og vi vonar vi er heldige å unngår fleire episodar der straumen forsvinn. Kommunal veg i Nordvika er stengt, men der er alternativ veg som kan nyttast. I Hånesbakkane har kommunen ordna ei tett stikkrenne. Nærare reparasjon lyt ein ta når vi er tilbake til normale tilhøve. Vaktmeistrane er i full beredskap, og melder elles at situasjonen langs kommunale vegar er under kontroll epr no, skriv ho.