– I kveld har vi gjennomført 51 testar, både hurtigtestar og PCR. Tolv nye positive er avdekt ved hurtigtest. Totalt tal smitta knytt til utbrotet er no 54. Testane er på veg til Molde no i kveld for å få raskt svar på PCR-testane, skriv Oppedal i ei tekstmelding til Synste Møre.
PCR-testing er eit sikkerheitstiltak då ein ser at nokre av hurtigtestane kan vere falske negative.
– Utbrotet held seg innan det same miljøet, og ein har ikkje funne noko smittebru ut i lokalsamfunnet per no, melder Oppedal.
Likevel bør ein vere obs ved symptom.
– Det har i løpet av dei siste dagane vore mange som har teke kontakt grunna mogleg smitteeksponering i nabokommunane våre. Det har vore konfirmasjonar i helga, og eg ber folk om å ha låg terskel for testing. Det er ekstra viktig no, skriv Oppedal.
Dei tolv nye smitta personane sit allereie i karantene.