Stadfestar mutert virus i Stad

– Onsdag vart omkring 130 personar testa for covid-19. Det var i hovudsak personar som vart testa på grunn av symptom, og nokre nærkontaktar til dei som fekk påvist smitte tysdag. Svar på prøvene viser at éin ny person har fått påvist smitte med covid-19. Personen er elev i klasse 10A ved Eid ungdomsskule. Smittevegen er kartlagt og det er ikkje grunn til å tru at eleven har blitt smitta på skulen. Eleven kan ha vore smittsam ved siste deltaking i skuleklassa som var måndag 8. mars, skriv Stad kommune i ei pressemelding torsdag kveld.

Elevar og tilsette i klasse 10A vert difor sett i karantene til og med 18. mars, og dei vil verte kalla inn til testing fredag. Prøvesvar er venta laurdag eller søndag. Alle husstandsmedlemmar til desse elevane/tilsette vert sett i ventekarantene. Ved negativt svar kan husstandsmedlemmar gå ut av ventekarantene, men elevar/tilsette må halde fram i karantene sjølv om denne første testen er negativ. Dei vil verte testa på nytt seinare i karanteneperioden, opplyser kommunen.

Andre elevar ved Eid Ungdomsskule vert særskilt oppmoda om ha så få nærkontaktar som mogeleg fredag og gjennom helga til situasjonen er betre kartlagd. Andre nærkontaktar til den smitta er også varsla om karantene og testing.

– I samråd med FHI er det gjort ei ny vurdering av risikonivå og aktuelle tiltak etter funn av mutert virusvariant. Allereie frå starten av utbrotet har ein valt å iverksette omfattande tiltak med karantene, testing og ventekarantene for å ta høgde for at det kunne vere ein slik virusvariant. Ein har også sett at det arbeidet som er gjort så langt under utbrotet, sjølv med ein mutert virusvariant, har ført til at ein har klart å kartlegge situasjonen godt. Alle smittetilfella er kopla til kvarandre. Vurderinga er at ein held fast på dei noverande tiltaka, skriv kommunen i pressemeldinga.